نتائج امتحانية .... حقائق و كوارث !!مقال سابق مرتبط "
امتحانيات " ...
علامة النجاح عند أبطال القصة ( 50 ) علامة ... و الله يكون بعون أصحاب الـ ( 60 ) !!!
بعد أن تقرأ المقالة السابقة .... ستعرف أننا وصلنا إلى تخمين النتائج من قبل الطلاب ... و الأمور هنا نسبية تختلف من طالب لآخر و من مادة لأخرى و من دكتور لآخر .. لكن دوماً هناك نفس الحالات و لو اختلف الأشخاص !!!
بالتأكيد ستعتقد في أحد الحالات أنني أتكلم عنك .... اطمئن , سأتكلم عنك و عني و عن كل الطلاب الذين أعرفهم و لا أعرفهم ,
الأسماء وهمية أو مستعارة أو شائعة جداً و لا تعبر بأي شكل عن هوية صاحبها ....لنبدأ بي أنا , فكنت قد قدرت علامتي بـ 75 علامة ... فيها 5 علامات مشكوك بها ( يا باخدها يا لا ) ... و بيني و بين نفسي : إذا الدكتور ظلمني باخد 60 و الحمدلله ...
و عذراً مسبقاً على استخدام اللهجة العامية في الحوارات لإطفاء الواقعية ( و ما نصير متل المسلسلات المدبلجة )--------------------------
تررررن ..... ترررررررن
آلو ... أهلا ... تمام و أنت كيفك ؟؟؟ بذمتك ؟؟ شو آخد ؟؟؟ شوووووو ؟؟؟ متأكد أنت ؟؟؟؟ كيف بس هيك ؟؟؟ 53 بس !!!!
يالله منيح اللي ما حملتها ... بس كيف هيك ؟؟ كيف العلامات بشكل عام ؟ شو آخد أنت ؟
الهاتف : كل العلامات تقريباً هيك , أنا 58 , رمضان آخد 51 ... إلخ
أنا : ماشي الحال ... شكراً الك , أنا نازل بكرة عالجامعة بتوصي شي ؟؟
الهاتف : أنا كمان نازل ... بشوفك هنيك ...--------------------------
و في الجامعة طالعت النتائج كلها و متل العادة مفاجآت كثير ... كنا في الجامعة أنا و رمضان و يحيى الذي كان قد خبرني بالمادة و كان أحمد أيضاً ... و دار الحديث التالي :
--------------------------
كيف الشباب ؟
أهلا .... كيفك أنت ؟؟ شو عجبتك العلامة ؟؟
أنا : (.....) لو لا يكون (.....) العمى شو طلع ( ..... )
أحمد : و أنا يا زلمي ظالمني ... كنت متوقعها 85 طلعت 83 ... بس بدي أعرف على شو مروحلي هالعلامتين !
رمضان : ( بسخرية طبعاً ) : صاير فيك متلي .... و أنا مروحلي 20 علامة ما بعرف وين !!
يحيى : أنا هيك كنت قايل تقريباً .... بحدود الـ 65 و طلعت 58 ... عادي يعني
أنا : تعالوا نشوف علامة العقاب ... لما سألته بعد المادة قال " يعني .. ما إشبا شي " ... ليك آخد 87 .... أما شو حفة ؟؟؟ يعني كذب ولا شو ؟؟ مابعرف !!
يحيى : بلكي قصدو حفة الأول ؟؟؟
ها ها ها ها ها ( ضحكة جماعية باستثناء أحمد المهموم للعلامتين الضائعتين ) ...
رمضان : ليكوا محمود شو آخد .... 49 كان مقدرها 75 و حملها !!!!
يحيى : و محمد كمان 48 و كان مقدرها 70
أنا : بس شوف علي آخد 81 مع أنو قال " بشيلها " !!
يحيى : أعلى علامة لعلاء .... بتتذكر لما سألناه بعد المادة شو قال ؟؟
أنا : قال " انشالله " و قالها من غير نفس و ضاربنا بمنية .. اللي بيشوفو وقتها بيقول هادا أكلها ...
رمضان : ما حدا جايب متل مو مقدر إلا يحيى !!!
أنا : صدفة ... يبدو أنو هالدكتور ما بيصحح إلا عطريقة التابع Random .... علامة عشوائية و علامة العملي بتنجمع معها و هيك ...
يحيى : لا .... الطلاب فيهن كتيرين بيكذبوا ... واحد بيقلك مو منيح و هوي ما بترحلو و لا علامة !
أنا : و في طلاب ما بيعرفوا يقدروا العلامة ... و في طلاب بيكذبوا بالعكس حتى يتهموا الدكتور ... بس بصراحة ... و أنتوا بتعرفوا اني بقدر علامتي بالعادة تماماً و حتى أحياناً بتطلع أكتر بشوية من التقدير ... هادا الدكتور إما مو مصلح أو عندو أسلوب خاص جداً فيه !!!
رمضان : يعني بدها حكي ؟؟ مو مبينة ؟؟!!
أحمد : بس لو أعرف كيف رايحة هالعلامتين !! أصلاً أنا كنت مقدرها 86 و قلت 85 بس طلعت 83 يعني في 3 علامات ظلم مو 2 بس !!! أففففففففف بس يالله منيحة مو منيحة ؟؟--------------------------
لا داعي هنا لأخبركم بأننا أصبنا بحالة مغص جماعية بسبب العلامتين أو الـ 3 علامات الضائعة لأحمد و نصحناه بعدم تقديم اعتراض حتى لا ينقم عليه الدكتور و كما أشرنا إليه فعل ...
--------------------------
شو شباب بتفتوها ؟؟
يحيى : أهلا شريك ... بدنا نهزمهن !!
رمضان : وين بدنا نقعد ؟؟
أنا : عندي بالشقة ..
أحمد : بس لو أعرف ليش رايحة هالعلامتين !!---------------------------
:
