ممكن مساعدة , أريد معلومات عن ISPS , GMDSS

[ugaritian]

الشهادات المطلوب توفرها على السفينة موجودة بشكل شامل بالملف المرفق بس انكليزي. ممكن اعملكون ملخص عربي بس بدو وقت, ايمتا الامتحان؟



حمد الله عسلامتك استفقدتلك

[Christopher Columbus]

مشكور يا ابو العبد على جهودك وتعبك
بوركت يداك

[Bahreya]

و الله يا أبو العبد يسلمو ايديك و يكتر خيرك و شكراً ......... و إجاباتك للشباب كافية و وافية و أكثر ... يعني يعطيك العافية !

و في معلومة للشباب بخصوص مادة التشريعات ... يوم اللي عددلنا الدكتور الأوراق اللازمة للسفر كانت شي 20 تعداد و اجت بالامتحان كلها ديروا بالكن !

[Christopher Columbus]

يسلمو مديرنا بحرية بلكي الشباب كمان بيدعولك بلامتحان

[damascus]

قالو لي الشباب أن قسم لابأس به من الأسئلة يأتي من المحاضرة الأخيرة
ديرووووووووووووووووووووووووووووووووووووووو بالكم

على كل يقولون أن نسبة النجاح عند الدكتور دائما عالية

وأهلا

[ugaritian]

GMDSS: Global Maritime Distress Safety System
هونظام اتصالات (استغاثة) يضمن امكانية الوصول الى السفن المستغيثة و تنسيق و تسهيل مهمة البحث عنها و انقاذ طواقمها
استفاد النظام من التقدم التكنولوجي السريع في مجال الاتصال و تم فرضه على جميع السفن في اواخر التسعينات
يقسم النظام السفن بحسب مناطق ابحارها و ليس حسب حمولتها او طولها او طبيعة بضاعتها (بضاعة او ركاب او نفط)

يفرض النظام على السفن حمل معدات معينة سناتي على تفصيلها لاحقا كما يفرض على السفن ان تحمل افرادا مؤهلين على التعامل مع تلك الجهزة و المعدات , و قد كان هذا النظام السبب في الاستغناء عن ضابط الراديو في السفن حيث انه اعطى المالك حرية الاختيار بين ضابط راديو متفرغ للنظام او ضابطين ملاحيين مؤهلين لاستخدامه.

و الان الى الشرح:

منطقة الابحار الاولى: area 1: تمتد من الساحل الى عمق 20-30 ميل و هو المجال الذي من الممكن ان تتصل عبره محطتين ارضية و بحرية بواسطة الراديو على الترددات العالية جدا VHF و الاجهزة المطلوبة للسفن التي تعمل في هذه المنطقة هي:
عدد 2 جهاز ارسال/استقبال VHF مزود ب جهاز نداء رقمي DSC: Digital Selective Calling الذي يسمح بنداء المحطات الارضية و البحرية رقميا (متل الموبايل)
عدد 3 جهاز لاسلكي محمول VHF ليتمكن الطاقم من انزالها معه الى عائمات النجاة
جهاز Navtex و هو جهاز تلكس لاسلكي وظيفته استقبال نشرات الطقس و التحذيرات الملاحية
جهاز EPIRB: Emergency Position Indicating Radio Beacon وظيفته ارسال موقع السفينة الىا مراكز البحث و النقاذ في حال غرقها و عن طريق الاقمار الصناعية
عدد 2 جهاز SART: search and rescue radar transponder لتحديد موقع السفينة او عائمة النجاة على رادارت السفن الاخرى

منطقة الابحار الثانية: تمتد من حدود المنطقة الاولى الى 150-200 ميل, و الاجهزة المطلوبة هي الاجهزة السابقة المطلوبة للمنطقة 1 و يضاف اليها:
جهاز ارسال/استقبال لاسلكي يعمل على الترددات المتوسطة MF مزود بجهاز نداء رقمي DSC

منطقة الابحار الثالثة: Area 3 تقع بين خطي عرض 70 شمالا و 70 جنوبا: و تفرض على السفن حمل جميع الاجهزة السابقة للمنطقتين 1 و 2 بالاضافة لما يلي:
جهازي ارسال استقبال انمارسات سي INMARSAT C لارسال و استقبال االتلكس و اليميل عن طريق القمار الصناعية
او
جهاز ارسال/استقبال لاسلكي يعمل على الترددات العالية HF مزود بجهاز نداء رقمي DSC و وسيلة لطباعة التلغراف اللاسلكي (التلكس)

المنطقة 4: منطقة القطبين لا تغطيها اقمار اينمارسات لذلك يجب ان تحمل السفينة جهاز ارسال/استقبال لاسلكي يعمل على الترددات العالية HF مزود بجهاز نداء رقمي DSC و وسيلة لطباعة التلغراف اللاسلكي

لمعلومات اكثر تفصيلا اذهب الى الموقع التالي:

http://www.gmdss.com.au/concepts.htm

[ugaritian]

هلق ال ISPS: International Ship and Port Security Code

طلعولنا بهالحكاية بعد احداث 11 ايلول قال خايفيين من استعمال السفن في العمليات الارهابية

تضع هذه المدونة المعايير الامنية التي يجب اتباعها في السفن و الموانئ, فرضت وجود ضابط امن مؤهل في السفينة و كذلك في الميناء و وضعت قواعد التعاون بينهما
فرض وجود خطة امنية في السفينة Ship Security Plan توضح المداخل و المخارج و كيفية تأمينها
فرض سجل جديد على السفينة هو Visitors log book و بعتقد مبين من عنوانه
قسم الحالة الامنية للسفن و الموانئ الى 3 مستويات حسب مستوى الامن:
Level 1
Level 2
Level 3
انشاء الله منحكي فيه تفصيليا فيما بعد

[Christopher Columbus]

عنجد ابو العبد بشكرك كتير على هالمعلومات والدقة والسرعة في اعطاء المعلومة
خير الكلام ما قل ودل وانت وفيت بالغرض مشكور جدا جدا

هلق ال ISPS: International Ship and Port Security Code

طلعولنا بهالحكاية بعد احداث 11 ايلول قال خايفيين من استعمال السفن في العمليات الارهابية



فرض سجل جديد على السفينة هو Visitors log book و بعتقد مبين من عنوانه

على فكرة صحيح بزمناتو نزلت انا وصديق عالمرفا لناخد معلومات عن المحرك من احدى السفن
وطلعنا على باخرة حاويات اجنبية
ما خلونا نطلع ولحتى نورجيهن ال ID تبعنا كطلاب هندسة بحرية وسجلنا اسماءنا عالدفتر وتاريخ الزيارة وعطونا بطاقات مرقمة حطيناها برقبتنا ولما خلصت الزيارة رجعنا البطاقات
هي كلا تدابير امنية مطلوبة عالسفن حاليا

[ugaritian]

اهلين كريستو, انا سعيد لانك استفدت و كان ممكن ان تكون المعلومات افضل و ارتب بكتير لو كان معنا وقت اكثر, بس قرب موعد الامتحان جعلني اكتب المشاركة بسرعة الساعة 2 بالليل, فتقبل اعتذاري و اتمنى ان يتم طرح الموضوعين (GMDSS, ISPS) مرة ثانية لنستفيض بشرحهما اكثر و لا تنسى ان تصحح لنا الموضوع الثالث IMF

[damascus]

هذا الدكتور صاحب مادة التشريعات دائما يتجه بأسئلة عملية واقعية لهيك مايبعثه لكم أبو العبد مهم ( أنا قدمت عنده مادة مدخل إلى الهندسة البحرية)
الله يوفقكم
أنا ستكون عندي السنة الجايية

[ugaritian]

هذا الدكتور صاحب مادة التشريعات دائما يتجه بأسئلة عملية واقعية لهيك مايبعثه لكم أبو العبد مهم ( أنا قدمت عنده مادة مدخل إلى الهندسة البحرية)
الله يوفقكم
أنا ستكون عندي السنة الجايية

في خدمة الشباب, لكن ارجو ممن يريد ان يسأل عن اية معلومة ان يعطيني وقتا للاجابة عليها اي لا يحشكني كما فعل كريستو لان ذلك سيؤثر على نوعية المعلومة التي سيتم تقديمها

[Christopher Columbus]

اهلين كريستو, انا سعيد لانك استفدت و كان ممكن ان تكون المعلومات افضل و ارتب بكتير لو كان معنا وقت اكثر, بس قرب موعد الامتحان جعلني اكتب المشاركة بسرعة الساعة 2 بالليل, فتقبل اعتذاري و اتمنى ان يتم طرح الموضوعين (GMDSS, ISPS) مرة ثانية لنستفيض بشرحهما اكثر و لا تنسى ان تصحح لنا الموضوع الثالث IMF

شكرا الك مرة تانية ابو العبد اكيد بعد الامتحان رح تكون المواضيع اكتر توسع واكثر شمولية مشكور عجهودك يا غالي ورح ضم هالمعلومات للمجلد البحري تبعي عالكمبيوتر وازا حدا من شباب بدو سيديات
maritime english موجود عندي ويفترض عند شباب البحرية يكون موجود
وعندي سيدي دليل مرافئ العالم world ports هادا للملاحين كتير مهم بضم خريطة المرفا الملاحية لدخول السفينة
ومعلومات عن كل مرافئ العالم اللي بتخص الملاحين port description

pre arrival information

navigation ( port limit . sea buoys ) 1
اللي بدو ياهن انا جاهز وبنسخلو ياهن على سيديات لانو احجامهن كبيرة

[ugaritian]

لاك عراسي كريستو, نحنا يا حبيب ما بدنا منك شي غير تشد حيلك بالدراسة و تبيضلنا وشنا بالشغل.

[Christopher Columbus]

يخليلي ياك ابو العبد بكرا المادة لنشوف شو بيصير معنا

[damascus]

شو بالكم خايفين من مادة بكرة

[Eng.Lojain]

يا حيف ع الشباب يا حيف
لو بتحضروا و بتابعوا وراء الدكتور ما كنتو بتنتظرو لقبل المادة بيوم و تبلشو اجتهااااد
على كل انشاء الله موفقين

[Bahreya]

يا حيف ع الشباب يا حيف
لو بتحضروا و بتابعوا وراء الدكتور ما كنتو بتنتظرو لقبل المادة بيوم و تبلشو اجتهااااد
على كل انشاء الله موفقين

اي شو دكتور عم يحكي مو طالب هاد .... ما تكون مدسوس ؟؟؟ مين داسك ولا ؟؟







طبعاً هالأسئلة لازم يكونوا سألوها قبل بس إذا بتتذكر من كم سنة لما اجتمعنا و ناقشنا الأجوبة .. كم معركة قامت بيناتنا على تحديد الأجوبة و بالأخير بقي 5 عبارات صح و خطأ ما اتفقنا عليها رغم أنو الكتاب معنا و ملخصات المحاضرات معنا !!